സിപിഎം കണ്ണൂർ ജില്ലാ സമ്മേളനത്തിന് ചെങ്കൊടി ഉയര്‍ന്നു
പഴയങ്ങാടി : സിപിഎം കണ്ണൂര്‍ ജില്ലാ സമ്മേളനത്തിന് തുടക്കം കുറിച്ച്‌ ചെങ്കൊടി ഉയര്‍ന്നു. ആവേശം നിറഞ്ഞ അന്തരീക്ഷത്തില്‍ സ്വാഗതസംഘം ചെയര്‍മാന്‍ ടി.വി. രാജേഷ് പതാക ഉയര്‍ത്തി. കേന്ദ്രക്കമ്മിറ്റി അംഗങ്ങളായ ഇ.പി. ജയരാജന്‍, പി.കെ. ശ്രീമതി, എം.വി. ഗോവിന്ദന്‍, കെ.കെ. ശൈലജ, എന്നിവരും സംസ്ഥാന കമ്മിറ്റി അംഗങ്ങളായ എം.വി. ജയരാജന്‍, പി. ജയരാജന്‍, കെ.പി. സഹദേവന്‍, ജയിംസ് മാത്യു, ജനറല്‍ കണ്‍വീനര്‍ കെ പത്മനാഭന്‍ എന്നിവരും പങ്കെടുത്തു.
കരിവെള്ളൂര്‍ രക്തസാക്ഷി സ്മൃതി മണ്ഡപത്തില്‍ കേന്ദ്ര കമ്മിറ്റി അംഗം പി.കെ. ശ്രീമതി ഉദ്ഘാടനം ചെയ്ത് ടി.ഐ. മധുസൂദനന്‍ എംഎല്‍എ നയിച്ച പതാക ജാഥയും, കാവുമ്പാ യി രക്തസാക്ഷികളുടെ മണ്ണില്‍ നിന്നും ജില്ലാ സെക്രട്ടറി എം.വി. ജയരാജന്‍ ഉദ്ഘാടനം ചെയ്ത് ടി.കെ. ഗോവിന്ദന്‍ നയിച്ച കൊടിമര ജാഥയും കണ്ണൂരില്‍ എകെജി പ്രതിമയ്ക്ക് മുന്നില്‍ കേന്ദ്ര കമ്മിറ്റി അംഗം ഇ.പി. ജയരാജന്‍ ഉദ്ഘാടനം ചെയ്ത് എന്‍. ചന്ദ്രന്‍ നയിച്ച ദീപശിഖാ റിലേയും പഴയങ്ങാടിയിലെ സമ്മേളന നഗരിയില്‍ സംഗമിച്ചു. തുടര്‍ന്ന് ചുവപ്പു വോളണ്ടിയര്‍മാരുടെ അകമ്പടിയോടെ ജാഥകള്‍ പൊതുസമ്മേളന നഗരിയിലേക്ക് പ്രവഹിച്ചു.
നാളെ രാവിലെ 9.30ന് ജില്ലാ കമ്മിറ്റിയംഗവും മുതിര്‍ന്ന നേതാവുമായ ഒ.വി. നാരായണന്‍ പ്രതിനിധിസമ്മേളന നഗരിയില്‍ പതാക ഉയര്‍ത്തും. 10 ന് മാടായി കോ- ഓപ്പറേറ്റീവ് റൂറല്‍ ബാങ്ക് ഓഡിറ്റോറിയത്തില്‍ മുഖ്യമന്ത്രിപിണറായി വിജയന്‍ പ്രതിനിധി സമ്മേളനം ഉദ്ഘാടനം ചെയ്യും. 250 പ്രതിനിധികളും 53 ജില്ലാ കമ്മിറ്റി അംഗങ്ങളും ജില്ലയില്‍നിന്നുള്ള സംസ്ഥാന കമ്മിറ്റിയംഗങ്ങളും പങ്കെടുക്കും.
സംസ്ഥാന സെക്രട്ടറി കോടിയേരി ബാലകൃഷ്ണന്‍, കേന്ദ്ര കമ്മിറ്റി അംഗങ്ങളായ എ. വിജയരാഘവന്‍, ഇ.പി. ജയരാജന്‍, പി.കെ. ശ്രീമതി, എം.വി. ഗോവിന്ദന്‍, കെ.കെ. ശൈലജ, സംസ്ഥാന സെക്രട്ടറിയറ്റ്‌ അംഗം ആനത്തലവട്ടം ആനന്ദന്‍ എന്നിവര്‍ സമ്മേളനത്തില്‍ പങ്കെടുക്കും. വൈകുന്നേരം അഞ്ചിന് മാധ്യമ സെമിനാര്‍ മന്ത്രി പി. രാജീവ് ഉദ്ഘാടനം ചെയ്യും. നാളെ വൈകുന്നേരം അഞ്ചിന് 'മതനിരപേക്ഷത നേരിടുന്ന വെല്ലുവിളികള്‍' സെമിനാര്‍ എ. വിജയരാഘവന്‍ ഉദ്ഘാടനം ചെയ്യും. ഞായറാഴ്ച വൈകുന്നേരം നാലിന്‌ പൊതുസമ്മേളനത്തോടെ സമ്മേളനം സമാപിക്കും.
